Seinnapartin var lutakastið til undankappingina til EM-endaspælið í manshondbólti í 2026 avgreitt á Hotel Clarion, ið liggur skamt frá flogvøllinum í Kastrup.
Føroyar vóru í potti 2, ið var næstovasti styrkisbólkurin.
Føroyar endaðu enn eina ferð í EM-undankappingarbólki saman við Ukraina. Ukraina var í potti 3.
Hini bæði liðini eru Kosovo úr potti 4 og Niðurlondum úr potti 1.
Føroyar eru í EM-undankappingarbólki 6.
26. apríl í fjør vunnu okkara menn sannførandi 33-26 (16-14) á Ukraina í høllini á Hálsi.
12. oktober í 2022 taptu vit 25-29 (11-11) fyri Ukraina á útivølli.
13. apríl í 2019 taptu vit tepurt og óheppið 26-27 (12-12) fyri Ukraina í høllini á Hálsi.
Í dystinum á útivølli 10. apríl í 2019 taptu vit stórt 19-30 (7-13) fyri Ukraina, so vit bøttu nógv upp á úrslitið upp á tríggjar dagar.
Í HM-undanundankappingardysti í Italia 11. januar í 2018 taptu vit greitt 22-30 (9-13) fyri Ukraina.
Ukraina fer sannlíkt at spæla sínar heimadystir í Týsklandi.
22. juni í 2015 vunnu Føroyar 36-30 (19-12) á Kosovo í Emerging Nations kappingini í innleiðandi bólkaspælinum. Føroyar møttu aftur Kosovo í hálvfinaluni, og tá vunnu Føroyar 31-23 (17-15) á Kosovo.
Í finaluni í kappingini, ið var leikt í Kosovo vunnu okkara menn 27-24 (13-12) á Lettlandi.
17. juni í 2017 møttust Føroyar og Kosovo aftur í Emerging Nations hálvfinaluni, ið tá var leikt í Bulgaria. Føroyar vunnu dystin 33-30 (15-11). Í finaluni vunnu okkara menn 26-25 (13-11) á Turkalandi.
Niðurlond møttu vit í gomlu C-HM kappingini afturi í 1984. Tá taptu Føroyar 12-24 fyri Niðurlondum. Í C-HM kappingini í 1986 taptu Føroyar heili 13-35 (7-18) fyri Niðurlondum.
So minnini móti Niðurlondum eru ikki góð. Tann munurin, ið var millum liðini í 1984 og 1986 man tó vera nógv minkaður hesi 38-40 árini. Men Niðurlond hava eitt sera sterkt lið.
EM-endaspælið, ið verður leikt dagarnar millum 15. januar og 1. februar í 2026 hevur fýra leikvøllir. Teir eru Telenor Arena í Oslo, Jyske Bank Boxen í Herning, Malmö Arena í Malmö og Kristianstad Arena í Kristianstad.