Í gjár fekk løgreglan boð um eitt ferðsluóhapp við útkoyringina við Magn við Ringvegin í Havn.
Og bilurin, sum rendi á hin bilin, stakk av.
Politiið fór at kanna málið og funnu bilin nakrar tímar seinni um 18-tíðina. Bilurin stóð parkeraður uttan fyri eitt hotell í Havn.
Løtu seinni kom bilførarin út fyri at roykja, og politiið royndi at fáa hann friðarliga við sær. Men friðarliga gekk tað so ikki. Maðurin gjørdi mótstøðu, so tey endaðu í forhøllini, har hann bleiv handtikin. Tað gekk so mikið harðligt fyri seg, at politiið mátti brúkar piparspray.
Komin oman á politistøðina, bleiv hann skuldsettur fyri at hava koyrt ávirkaður, uttan koyrikort, koyrt avstað frá einum óhappi og fyri ikki at halda sína víkiskyldu.
Viðkomandi var útlendingur, men hevur verið í landinum leingi – nóg leingi til ikki at blíva vístur av landinum.
Hetta er sama málið, sum Vágaportalurin skrivaði um í gjárkvøldið, og sambært hesum hendi hetta á Hotel Hilton í Havn.
