Frá startskotinum av vóru tað bara tveir bátar, sum vóru við í kappingini um sigurin millum 5-mannaførini við dreingjum, tá ið teir kappaðust í Klaksvík.
Sum undanfarnu ferðirnar vóru tað Heykur úr Hósvík og Fípan Fagra úr Klaksvík, sum kappaðus, eftir at Royndin Fríða eina løtu hevði roynt at blanda seg uppí.
Inntil hálvt málið var rógvið, lógu teir borð um borð. Onkra løtuna var Fípan Fagra fremri, og onkra løtuna var Heykur undan.
So vignaðist tað betur hjá Fípuni Føgru, sum vann seg eina stóra bátslongd framum, áðrenn tað varð farið undir endaspurtin. Heykur royndi at svara aftur, men teir úr Klaksvík hildu tørn og vunnu á heimastjógvi.
Tað eru bara hesir báðir bátarnir – Fípan Fagra og Heykur – sum hava møguleika at vinna FM. Sigurin ber við sær, at Fípan Fagra undan ólavsøku er tvey stig undan Heyki.
1 | Fípan Fagra | 05:26.04 | 7 | 0 | 0 |
2 | Heykur | 05:27.32 | 6 | 0 | 0 |
3 | Ørnin | 05:38.12 | 5 | 0 | 0 |
4 | Royndin Fríða | 05:45.18 | 4 | 0 | 0 |
5 | Teistin | 05:48.22 | 3 | 0 | 0 |
6 | Leikalind | 05:50.17 | 2 | 0 | 0 |
7 | Knúkur | 05:52.23 | 1 | 0 | 0 |
8 | Sílið | 05:52.34 | 0 | 0 | 0 |
9 | Firildur | 05:58.27 | 0 | 0 | 0 |
10 | Dúgvan | 06:00.00 | 0 | 0 | 0 |
11 | Ingibjørg | 06:01.30 | 0 | 0 | 0 |
12 | Fenja | 06:07.24 | 0 | 0 | 0 |
FM støðan
1 Fípan Fagra 40
2 Heykur 38
3 Ørnin 28