Liðið hjá Áka Egilsnes, Allani Norðberg og Nicholas Satchwell, KA av Akureyri endaði á sætta plássinum í grundspælinum í Ólís-deildini sum er besta íslendska hondbóltsdeildin.
Tað merkir, at KA skal spæla fjórðingsfinalur móti Vali sum endaði á triðja plássi í grundspælinum.
Nú eru fjórðingsfinalurnar ásettar.
KA spælir á heimavølli móti Vali týskvøldið 1. juni klokkan 19, og returdysturin verður spældur í Reykjavík fríggjakvøldið 4. juni klokkan 21.
Samlaði vinnarin vinnur seg víðari í hálvfinalurnar. Í fjórðingsfinaluuppgerðunum telja mál á útivølli dupult.
Í grundspælinum sermerkti KA seg við at spæla nógv flestar javnleikir. Sjey av 22 dystum hjá KA í grundspælinum endaðu við javnleiki.
Tá KA og Valur hittust á Akureyri í grundspælinum 18. februar endaði dysturin við javnleiki 27-27.
Tá liðini hittust aftur fyri stuttum í Reykjavík 24. maj vann Valur 31-27.
Í grundspælinum fekk Valur 27 stig meðan KA fekk 25 stig.