Í løtuni eru fýra partrolarapør á upsaveiði. Tey fáa eisini nakað av hjáveiði, men skipini hava smáligan fiskiskap eftir upsa.
Nú er gulllaksavertíðin eisini byrjað, og hon varar vanliga til einaferð tíðliga á heysti. Tvey partrolarapør eru farin á gulllaksaveiði.
Um nakrar dagar loysir nýggi Eysturbúgvin, og teir fara eisini at fiska gulllaks í vertíðini hesaferð. Sjey mans verða við skipinum.
Á Fiskamarknaði Føroya vita tey at siga, at ein djúpvatnstrolari er á svartkalvaveiði. Teir koma inn at landa tíðliga í hesi vikuni.
- Ein frystitrolari fiskar svartkalva, og ein annars er á beding, verður lagt aftrat.
Í løtuni eru seks av teimum smáu trolbátunum norðanfyri. Teir fáa mest av toski, hýsu og so nakað av flatfiski.
- Vit rokna við, at allir trolbátarnir koma inn at landa síðst í hesi vikuni.
Á Fiskamarknaði Føroya vita tey eisini at siga, at tvey garnaskip fiska svartkalva, og tvey fiska havtasku.
- Fiskiskapurin eftir svartkalva er misjavnur, men teir, sum fiska havtasku, hava brúkiligan fiskiskap.
Øll garnaskipini koma inn at landa í hesi vikuni.
