Í fleiri kommunum var skattainntøkan fyrra hálvár í ár lakari, enn hon var tað sama tíðarskeið í fjør.
Soleiðis var tað í trimum av teimum sjey kommununum í Suðuroy, vísir fyribils skattauppgerðin.
Í Hovs, Hvalbiar og Porkeris kommunum var skattainntøkan minni fyrra hálvár í ár, enn hon var í fjør. Í Hovi var afturgongdin 10,97 prosent ella 168.691 krónur.
Í Hvalba og Sandvík var afturgongdin 0,79 prosent ella 91.087 krónur.
Í Porkeri var afturgongdin 3,2 prosent ella 170.654 krónur.
Lutfalsliga var vøksturin størstur í Fámjins kommunu. Har var meirinntøkan 21,75 prosent ella 263.058 krónur.
Í krónum var vøksturin í Tvøroyrar kommunu væl størstur í Suðuroy. Fyrra hálvár í ár runnu 1.164.121 fleiri skattakrónur í kommunukassan á Tvøroyri, enn tað gjørdu sama tíðarskeið í fjør. Lutfalsligi vøksturin var 3,88 prosent.
Í Vágs kommunu var vøksturin 0,17 prosent ella 39.323 krónur.
Í Sumbiar kommunu var vøksturin 110.082 krónur ella 2,26 prosent.