Fýrverk fyri Firvaldi

Tað var fýrverk yvir Tvøroyri og Trongisvági, tá ið 5-mannaførini við kvinnum vóru farnar um málið í góðveðrinum á Tvøroyri, har tað í fínastu líkindum er jóansøkukappróður.

Firvaldur vann á fjarðastevnu á Skálafjørðinum næstsíðsta leygardag, og Firvaldur vann í heimasjógvi ídag. Tað ber við sær, at nú er Firvaldur fremstur í FM kappingini.

Firvaldur fleyg beinanvegin avstað. Eftir 100 metrar var Firvaldur hálvan skutin undan Bliki og Erlu Kongsdóttir, og síðani var ongantíð nakar ivi um, at Firvaldur fór at vinna. Erla Kongsdóttir kappaðist eina løtu við Blik um næstfremsta plássið. Ta kappingina vunnu tær úr Fuglafirði, men tær megnaðu einki at gera við Firvald. Manningin stórfegnaðist, og áskoðararnir stórfegnaðust um, at tað eydnaðist einum av bátunum hjá Froðbiar Sóknar Róðrarfelag at vinna á jóansøku á Tvøroyri.

Tíðirnar í hesum róðrinum eru ikki enn tøkar á rsf.fo