Hans Anders er nú formaður í IRF

Fimm av seks nevndarlimum vóru nývaldir á aðalfundinum, sum var í dag

Eftir aðalfundin í dag er nevndin mest sum spildurnýggj, og bæði formaðurin og næstformaðurin í IRF eru nývaldir.

Einasti av seks nevndarlimum, sum eisini sat í undanfarnu nevndini, er Bjarki Henriksen á Sandi.

IRF skrivar soleiðis á heimasíðu síni:

Á aðalfundi hjá IRF í dag varð nevndin mannað av nýggjum, og hesi vórðu vald:

Gunvá við Keldu, Klaksvík, Hans Anders Jacobsen, Strendur, Oluf Müller, Kvívík, Jóanis Albert Nielsen, Sandavágur, Bjarki Henriksen, Sandur og Alvi Mortensen, Tvøroyri.

Nevndin skipaði seg beint eftir fundin við Hans Anders Jacobsen sum formanni og Jóanis Albert Nielsen sum næstformanni.

Í mun til gomlu nevndina, vórðu 5 fólk skift úr nevndini. Í gomlu nevndini vóru: Tummas Lervig, Klaksvík, Artur Johansen, Strendur, Petra Iversen, Kvívík, Jonhard Joensen, Sandavágur, Bjarki Henriksen, Sandur og Kristina Roest, Trongisvágur.

Nevndin hjá IRF verður vald eftir kommunuvalini og situr í fýra ár. Viðtøkurnar siga, at seks fólk verða vald í nevndina at umboða hvør sítt øki.