Guvernørurin á Krim-hálvoynni, Mikhail Razvozjajev, sigur á boðtænastuni Telegram í dag, at høvuðsstøðin hjá russiska svartahavsflotanum er álopin.
Í russiska verjumálaráðnum vátta tey eisini, at í minsta lagi eitt fólk hevur latið lív.
- Høvuðsstøðin hjá flotanum er rakt í einum fíggindaligum rakettálopi, skrivar Mikhail Razvozjajev á Telegram og leggur aftrat, at neyðhjálparfólk eru á staðnum.
Hann leggur aftrat, at eldur er í høvuðsstøðini, men at sløkkiliðsfólk nú hava tamarhald á eldinum.
Reuters endurgevur guvernørin, sum ávarar móti nýggjum ukrainskum loftálopum móti Krim-hálvoynni.
- Eitt nýtt álop er møguligt, sigur Mikhail Razvozjajev, sum heitir á fólk um ikki at fara inn í miðbýin, men heldur at halda seg innandura og søkja sær skjól.
Sambært útlendskum miðlum seinnapartin í dag hava ukrainsku myndugleikarnir ikki gjørt viðmerkingar til álopið á høvuðsstøðina á Krim.
Ukraina hevur framt eina røð av álopum við dronum og rakettum á Krim seinastu vikuna, og í seinastu viku varð eitt russiskt landgonguskip og ein kavbátur raktur.
Norska kringvarpið - NRK - viðgerð eisini ukrainska álopið á Krim-hálvoynna í dag, har eldur er í høvuðsstøðini hjá svartahavsflotanum.
