Náttarkoyringin við gróti frá Sandoyartunlinum ígjøgnum Havnina til Runavíkar er steðgað. Tórshavnar kommuna hevur sett forboð fyri hesari koyring, tí hon órógvar náttarfriðin í høvuðsstaðnum.
Avleiðingin av forboðnum verður, at Sandoyartunnilin fer at dýrka og verður seinkaður. Rokningin fyri hetta endar í landskassanum.
Landsstýrismaðurin í fíggjarmálum fer nú at taka stig til at finna eina semju við Tórshavnar kommunu um koyringina.
Jørgen Niclasen segði í dag við Kringvarpið, hann fer at bjóða borgarstjóranum í Havn til fundar í hesi vikuni fyri at finna eina loysn, sum báðir partar kunnu liva við.
Heðin Mortensen tekur ímóti innbjóðingini og sigur við Kringvarpið, hann er sinnaður at finna eina haldbara loysn á trupulleikanum.
