Sunnudagin 1. desember klokkan 14.30 spælir føroyska hondbóltskvinnulandsliðið annan dystin í EM-endaspælinum í Sankt Jakobshøllini í Basel í Sveis.
Dysturin verður ímóti Kroatia sum í hesum døgum fyrireikar seg á heimavølli í einari kapping, ið verður nevnd: Croatia Cup.
Fríggjakvøldið vunnu kroatisku kvinnurnar í hesari kapping greiðan 26-18 sigur á Norðurmakedonia. Í steðginum var Kroatia á odda 14-8.
Sunnudagin spælir Kroatia dyst móti Serbia, so tær vera væl sparraðar undan EM-endaspælinum.
Komandi fríggjakvøld klokkan 19.30 spælir Kroatia móti Danmark í okkara EM-bólki. Sama dag klokkan 17 spæla okkara móti vertstjóðini, Sveis.
