Forsetin í Fraklandi, Emmanuel Macron, heitir á donsku myndugleikarnar um, at kanadiski-amerikanski umhvørvisaktivisturin Paul Watson ikki verður útflýggjaður til Japan.
Tað boðar forsetaskrivstovan frá sambært fronsku tíðindastovuni AFP.
Paul Watson er varðhaldsfongslaður í Grønlandi til 15. august, tá tað á rættarfundi verður avgjørt, um hann skal útflýggjast til Japan.
Watson, sum er 73 ára gamal, er ein av stovnarunum av Greenpeace og umstríddur aktivistur. Í 2010 gav Japan út handtøkuboð um hann í sambandi við eina hending í Antarktis, har Watson blandaði seg uppí, meðan japanskir hvalaveiðarar arbeiddu.
Í fráboðanini frá Macron sæst, at hann "fylgir væl við støðuni" og er í sambandi við danskar myndugleikar.
Í Fraklandi er online undirskriftainnsavning á netinum, sum krevur, at Watson verður leyslatin, fingið 388.000 undirskriftir.
Watson varð handtikin í Grønlandi sunnudagin.
Grønlendska løgreglan hevur upplýst, at tað er danska løgmálaráðið, sum ger av, um umhvørvisaktivisturin skal burturvísast ella ikki.
/ritzau/
