Hóskvøldið hin 28. september verður kunnandi borgarafundur í hølunum hjá kommunuskrivstovuni á Sandi.
Lagt verður fyri klokkan 18.
- Mowi Faroes ynskir við hesum at bjóða til kunnandi fund, nú alivirksemi hevur verið á Sandsvág í nøkur ár.
Soleiðis verður sagt á Facebook-vanganum hjá Sands kommunu í dag, og fráboðanin er frá alifyritøkuni, sum hevur virksemi her.
Víst verður á, at tilgongdin til aling á Sandsvág byrjaði við ymiskum kanningum við aliútgerð, mátingum av aldu og streymi á vágni.
- Alivirksemið hjá okkum er síðan bæði broytt og vaksið, og hesum fara vit at greiða nærri frá, sigur alifelagið.
Mowi verður sjálvsagt við á kunnandi borgarafundinum, og her fara starvsfólk hjá fyritøkuni at greiða frá virkseminum á og kring Sandsvág.
- Øll eru hjartaliga vælkomin, sigur Mowi Faroes í sínari fráboðan á Facebook-vanganum hjá Sands kommunu í dag.