Nú eydnaðist hjá gentunum úr Klaksvík

Higartil í ár hava tað verið menninir og dreingirnir úr Klaksvík, sum hava verið óførir í kappróðri, meðan tað ikki hevur hilnast heilt so væl hjá gentunum og kvinnunum.

Á sundalagsstevnu á Skálafjørðinum næstsíðsta leygardag var Fípan Fagra nummar trý í kappingini millum gentur, og Sævarmoy, sum eisini er úr Klaksvík, endaði á fjórða plássi.

Ta ferðina vóru Drekin hjá Havnar Róðrarfelag og Firvaldur av Tvøroyri tríggjar bátslongdir undan teimum úr Klaksvík.

Í dag var heilt øðrvísi. Fípan Fagra bjóðaði beinanvegin av, og saman við Drekanum og Firvaldi vóru tær støðugt frammi í oddinum. Drekin og Fípan Fagra vóru drúgvast, og sum hesir báðir bátarnir stevndu fram ímóti málinum sást, at í dag vóru tær úr Klaksvík drúgvari, enn tær vóru fyri stórari viku síðani.

Fípan Fagra var reingina undan Drekanum, sum var reingina undan Firvaldi. Tað vil siga, at tað var ikki meiri enn skuturin frá vinnaranum og aftur til nummar trý.

Nýggi báturin hjá kollfirðingum, Kjósin, endaði á fjórða plássi – væl aftanfyri Firvald og dygst undan Tambar, Sævarmoy, Huldu og Títlingi.