Seks partrolarapør eru til fiskiskap í løtuni. Skipini fáa mest av upsa og nakað av hvítum fiski.
- Partrolararnir hava smáligan fiskiskap, men onkur pør gera brúkilig hál.
Á Fiskamarknaði Føroya vita tey at siga, at flestu partrolarar nýliga eru byrjaðir túr.
- Tí koma helst bara tvey pør inn at landa í vikuni sum kemur.
Um djúpvatnstrolararnar verður sagt, at ein ísfiskatrolari fiskar kongafisk vestanfyri. Teir koma helst inn at landa síðst í næstu viku.
- Ein djúpvatnstrolari er á Íslandsrygginum og fiskar tosk. Teir koma eisini inn at landa í næstu viku.
Hinir djúpvatnstrolararnir liggja.
Tríggir av teimum smáu trolbátunum hava verið á Skeivabanka, og tveir hava verið norðanfyri.
- Fiskiskapurin á Skeivabanka hevur verið brúkiligur, men tað hevur verið smáligt norðanfyri.
Lagt verður aftrat, at allir trolbátarnir koma inn at landa í næstu viku.
Tvey garnaskip fiska svartkalva, og eitt fiskar havtasku.
- Garnaskipini hava smáligan fiskiskap, men tey koma øll inn at landa í næstu viku, siga tey á Fiskamarknaði Føroya.
