Risastóra bingjuskipið, Ever Given, sum telist millum heimsins størstu, rendi seg fast í Suez-veitini í endanum av mars í ár. Tað tók seks dagar at fáa skipið leyst aftur, men síðan skipið gjørdist leyst, hevur tað verið afturhildið av myndugleikunum í Egyptalandi í einari 100 dagar.
Meðan skipið lá tvørt fyri á hesi siglingarleið, sum telist millum heimsins týdningarmiklastu, foraði tað skipaferðsluni at sigla gjøgnum Suez-veitina, og hetta hevði stórar útreiðslur fyri altjóða skipaferðsluna í økinum.
Seint fyrrapartin í dag kundi Ever Given halda fram á leiðini norður eftir móti Port Said og egyptisku miðalhavsstrondini.
Eigararnir av skipinum, sum er skrásett í Panama, hava síðan hendingina í mars togast við myndugleikarnar í Egyptalandi um, hvussu stórt endurgjaldið fyri mistar inntøkur skal vera. Tískil hevur skipið verið afturhildið og hevur ligið uppankrað í einari vík í Sues-veitini.
Kravið hjá egyptisku myndugleikunum móti reiðarínum var upprunaliga 900 miljónir dollarar, sum síðan er minkað niður í 550 miljónir dollarar - ella slakar 3,5 miljardir krónur.
Tað eru japanesarar, sum eiga skipið, og sambært útlendskum miðlum gjørdu eigararnir og kanal-myndugleikarnir semju um endurgjaldið, sum higartil ikki er upplýst alment.
- Tískil verður skipið ikki afturhildið meira og er nú á veg norður ígjøgnum seinasta partin av Sues-veitini - við 18.300 bingjum umborð, veit tíðindastovan Reuters at siga í dag.
