Eysturoy hevur vunnið færri skattakrónur enn í fjør

Tað renna ikki so nógvar skattakrónur í flestu kommunukassarnar, sum tað gjørdu í fjør. Tað vísir fyribils uppgerðin hjá TAKS.

Hetta er eisini galdandi fyri tær flestu av teimum sjey kommununum í Eysturoy – Eiðis, Fuglafjarðar, Eystur, Runavíkar, Nes, Sjóvar og Sunda kommunu. Henda seinast nevnda fevnir um bygdir bæði í Eysturoy og í Streymoy.

Í tveimum kommunum var skattainntøkan fyrra hálvár hægri, enn hon var sama tíðarskeið í fjør.

Í Nes kommunu, ið fevnir um bygdirnar Nes, Toftir og Saltnes, var vøksturin 0,48 prosent ella 129.697 krónur.

Í Sjóvar kommunu, ið fevnir um bygdirnar Innan Glyvur, Strendur, Kolbeinagjógv, Morskranes og Selatrað, var vøksturin 0,38 prosent ella 82.802 krónur.

Lutfalsliga størsta afturgongdin var í Fuglafjaðar kommunu, sum umframt Fuglafjørð fevnir um Kambsdal og Hellurnar. Har var minniinntøkan 3,15 prosent ella 1.144.868 krónur.

Í krónum var afturgongdin størst í Runavíkar kommunu, sum fevnir um 15 bygdir – Æðuvík, Rituvík, Runavík, Saltangará, Glyvrar, Lambareiði, Lamba, Søldarfjørð, Skipanes, Skálafjørð, Skála, Oyndarfjørð, Elduvík, Funningsfjørð og Funning.

Har var minniinntøkan 1.261.857 krónur ella 1,47 prosent.

Í Eysturkommunu, ið fevnir um Leirvík, Norðragøtu, Gøtugjógv og undir Gøtueiði, var minniinntøkan 1.245.179 krónur ella 2,7 prosent.

Í Eiðis kommunu, sum fevnir um Eiði og Ljósá, var minniinntøkan 0,7 prosent ella 92.131 krónur.

Sunda kommuna fevnir um Gjógv, Svínáir, Norðskála, Oyrabakka og Oyri í Eysturoy og í Streymoy fevnir kommunan um Tjørnuvík, Haldórsvík, Steymnes, Hvalvík og Hósvík. Har var minniinntøkan 0,95 prosent ella 349.861 krónur.

Undantikið tveimum kommunum er skattaprosentið tað sam í ár, sum tað var í fjør. Annað undantakið er Runavíkar kommuna, har skattaprosentið nú er 21,5. Í fjør var tað 21,75. Hitt undantakið er Fuglafjarðar kommuna, har skattaprosentið nú er 21,25. Í fjør var tað 21,5 prosent.

Niðanfyri yvirlitið, sum vísir skattainntøkurnar fyrra hálvár í fjør og í ár, er yvirlit, sum vísir skattaprosent og barnafrádrátt. Umframt hesi viðurskifti plaga kostnaður fyri pláss í vøggustovu, barnagarði og frítíðarskúla at vera við, tá ið kommunur verða sammettar umframt sonevnda frítíðarkortið, ið summar kommunur hava havt seinastu árini.

Skattainntøkur