Evropeiska smittuverjuskrivstovan - ECDC - hevur nú dagført sítt kort yvir smittustøðuna í Evropa, soleiðis sum skrivstovan sær koronu-støðuna í ymisku londunum.
Sigast skal, at tað eru ikki øll lond, sum fylgja ECDC í sínari greining av koronu-støðuni, og tískil kunnu tilmælini vera ymisk frá einum landi til annað.
Í nýggja kortinum hjá ECDC gerast fleiri lond og regiónir, sum áður vóru grønar, nú reyðgular ella reyðar.
Flestu regiónir í Danmark, Norðurjútandi, Miðjútlandi og Sælandi fara soleiðis frá at vera grønar til at gerast reyðgular. Keypmannahavnar regiónin fer frá gulum og verður nú reyð.
Meðan Spania og Portugál framhaldandi vera verandi reyð á ECDC-kortinum, gerast suðurfronsku regiónirnar, Occitanie og Provence-Alpes-Côte-d'Azur, reyðgular. Sama er galdandi fyri kroatisku regiónirnar, Dalmatia, Kvarner og Istria.
Stórir partar av Grikkalandi gerast eisini reyðgul, og regiónirnar kring høvuðsstaðin Athen gerast reyðar. Umtókta frítíðaroyggin Kreta var longu reyð í undanfarnu dagføring hjá ECDC, og eitt annað umtókt ferðamál - Kypros - verður verandi reytt.
Italia er einasti partur av Suðurevropa, sum verður verandi grønt.
Niðurlond, Belgia og Luxemburg hava havt stóra spjaðing í smittu, og her gerast Niðurlond og Luxemburg reyð - og Belgia verður reyðgult.
Gongdin í Noregi og Svøríki er á góðari leið. Agder, Trønderlag og Finnmørkin í Noregi eru grøn, og Rogaland er einasti partur av Noregi sum verður verandi reyðgult. Í Svøríki eru økini, Värmland og Dalarna, nú grøn.
##med2##
