Tey seinastu átta stykkini við meira um málið eru komin afturat.
Amerikanski tøknimiljarderurin og stjórin í Tesla, Elon Musk, roynir at ávirka komandi týska fólkatingsvalið.
Tað sigur ein talsmaður fyri týsku stjórnina, sambært Reuters.
Ákæran byggir á, at Musk vísti stuðul til týska høgraflokkin Alternative für Deutschland (AfD) í eini grein í týska blaðnum Welt am Sonntag og í einum uppslag á sosiala miðlinum X.
- Elon Musk roynir uttan iva at ávirka samveldisvalið, sigur talsmaðurin.
Men tøknimiljarderurin hevur sín rætt at siga síni sjónarmið, viðurkennir talsmaðurin hjá týsku stjórnini.
- Framsøgufrælsið fevnir hóast alt eisini um tað ringasta tvætl, ljóðar av týsku stjórnarskrivstovunum.
Í einum stuttum innleggi um X, sum Elon Musk sjálvur eigur, skrivaði Musk fyrr í desember, at bert AfD "kann bjarga Týsklandi."
Og í greinini í Welt am Sonntag skrivaði hann, at í hansara eygum stendur AfD fyri "politiskari realismu".
Musk vísti eisini á, at Týskland stendur fyri "búskaparligum og mentanarligum forfalli" og at AfD hevur røttu tilgongdina, eisini viðvíkjandi búskapi og fólkaflyting.
AfD er fyrst og fremst kent fyri sín stranga innflytarapolitikk.
Elon Musk hevur tætt samband við komandi amerikanska forsetan, Donald Trump, og skal átaka sær ein miðvísan leiklut sum ráðgevi hjá umsitingini hjá Trump.
Valið til samveldisdagin í Týsklandi verður 23. februar.
Her skulu týsku veljararnir kjósa eitt nýtt tjóðarting, og við tí grundarlagi skal ein nýggj stjórn skipast.
Valið varð útskrivað, eftir at týska samgongan fall í november, og eftir hetta samtykti eini meiriluti í tjóðartinginum misálit á samveldiskanslaran, Olaf Scholz, í desember.
Kjakinnleggið hjá Elon Musk í Welt am Sonntag, sum er sunnudagsútgávan av blaðnum Die Welt, hevur fingið kjakredaktørin í blaðnum, Eva Marie Kogel, at leggja frá sær.
Hon tosaði um uppsøgnina leygardagin á X.
Sambært týsku tíðindastovuni dpa hava fleiri journalistar hjá Die Welt eisini víst sína ónøgd við avgerðina hjá blaðnum at almannakunngera greinina hjá Musk.
/Ritzau/
