Tað bleiv bara til eitt stig til føroyingaliðini í triðbestu donsku fótbóltsdeildini í dag.
Daniel Johansen var við frá byrjan tá hann og liðfelagarnir í Thisted leiktu javnleik 2-2 móti Nykøbing á heimavølli.
Thisted fekk eina dreymabyrjan. Tá 21 minuttir vóru leiktir legði Emil Seedorff Thisted á odda 1-0. Átta minuttir seinni økti Mathias Myrthue til 2-0.
Bert fýra minuttir seinni minkaði Nykøbing um munin til 2-1.
Thisted var á sigurskós líka til 84 minuttir vóru farnir av dystinum. Tá javnaði Nykøbing til 2-2 og tók eitt stig við sær.
Thisted er nummar átta í deildini við átta stigum.
Hørður H. Askham var við frá dystarbyrjan tá hann og liðfelagarnir í AB taptu 0-1 til Middelfart á útivølli.
Middelfart skoraði sigursmálið tá ein hálvur tími var leiktur.
AB er nummar seks í deildini við níggju stigum.
