Til minnis um bróður, Tommy Falkenberg

Góði Tommy

 

Dagurin 9. august 2022 kemur altíð at vera dagurin, har eg misti mín besta vin og tvíburð. Hetta var dagurin, har tú eftir longri sjúkralegu ikki orkaði meir. Tú hevur verið mín trúgvasti vinur og ein dyggur stuðul, síðani vit saman komu í hendan heim 19. apríl fyri 58 árum síðani. Tað er óskiljandi, at tú ikki ert her longur. Títt lív endaði alt ov tíðliga, og tómrúmið er longu stórt. Seinasta tíðin hevur tó verið stríggin, og eg uggi meg við, at tú nú hevur fingið frið.

 

Nógvar góðar løtur hava vit deilt, í Føroyum og uttanlanda. Serliga minnist eg túrin í Keypmannahavn, tá vit vóru farnir niður at hyggja eftir fótbólti - HM endaspæl var. Vit fóru í Fælledparkina at hyggja á stórskermi, so kom ein journalistur frá DR til okkum og spurdi, um vit vildu vera við í eini samrøðu á live sjónvarpi. Eg var skeptiskur, men tú segði ja umgangandi, tí soleiðis vart tú, altíð klárur til eina góða uppliving. Tað var í tí samrøðuni at kendu orðini fullu: Vi elsker Danmark.

 

Tú vart ein eldsál. Helst eru nógv samd við mær í, at mann kundi ikki siga Tommy Falkenberg uttan at siga HB. Okkara Havnar Bóltfelag, har vit hava deilt nógvar gleðiligar stundir og eisini summi vónbrot. Eitt tað seinasta tú segði mær var: Vit eru føddir sum HB’arir, og vit doyggja sum HB’arir. Og nú tá tú fert á tína seinastu leið, ert tú eisini í HB-búnanum.

 

Góðu Heidi, Høgni, Andrias og Edvard. Tit hava staðið sum ein klettur undir liðini á Tommy. Meðan hann alsamt gjørdist veikari, gjørdust tit sterkari saman. Sorgin er stór, og ongi fløvandi orð kunnu fylla tómrúmið, tit kenna beint nú. Men Tommy livir víðari í okkara minnum.

 

Góði Tommy. Takk fyri tíðina eg fekk við tær her á fold.

 

Eg fari at enda hetta minningarorð við vøkru orðunum hjá Mouritsi Mohr Joensen:

 

Løtunar byrjaðu,

 

tveir dropar,

 

tvey hjørtu,

 

tvey lív.

 

Onnur løtan støðgaði,

 

ein dropi,

 

eitt hjarta,

 

eitt lív.

 

Hvíl í friði, kæri bróður.