USA fer at seta í verk eina røð av nýggjum revsitiltøkum móti Iran. Orsøkin er, at iranska stjórnin hevur veitt ballistiskar rakettir til Russlands.
Tað sigur amerikanski uttanríkisráðharrin, Antony Blinken, á vitjan í Bretlandi.
Sambært upplýsingunum hjá Blinken fer Russland væntandi at brúka iransku ballistisku rakettirnar í Ukraina.
Mánadagin upplýsti ein talsmaður fyri ES, at ES hevði fingið álítandi fregnartænastboð um, at Iran fór at veita ballistiskar rakettir til Russlands.
Og týsdagin upplýsir amerikanski uttanríkisráðharrin, at rakettirnar eru komnar.
- Russland hevur nú fingið fleiri sendingar av hesum ballistisku rakettum og fer helst at brúka tær innan fáar vikur í Ukraina móti ukrainarum, sigur Antony Blinken á tíðindafundi í bretska høvuðsstaðnum, London.
Bretski uttanríkisráðharrin, David Lammy, kallar iransku vápnaveitingina til Russlands fyri eina "eskalering".
- Tað, sum vit síggja úr Iran, órógvar. Tað er avgjørt ein verulig eskalering, sigur David Lammy á felags tíðindafundi við Blinken.
Bæði franska, týska og bretska stjórnin fordøma harðliga rakettflutningin.
Tey fara at arbeiða fram ímóti at seta í gildi revsitiltøk móti flogfelagnum Iran Air. Tað skrivar týska uttanríkisráðið í felags fráboðan frá teimum trimum londunum týsdagin.
- Hetta tiltakið er ein eskalering hjá bæði Iran og Russlandi, og tað er ein beinleiðis hóttan móti evropeisku trygdini, stendur í fráboðanini.
Mánadagin noktaði Iran at hava sent rakettir til Russlands.
Tað vóru CNN og Wall Street Journal, sum fingu søguna á dagsskránna í síðstu viku við at siga frá, at Iran hevði veitt Russlandi stuttrøkkandi rakettir.
Tá Kreml varð spurt um frágreiðingarnar mánadagin, varð sagt, at Iran er samstarvsfelagi hjá Russlandi, og at londini bæði menna dialog á øllum økjum.
Ein ballistisk rakett heldur fram við síni leið móti mállinum, eftir at høvuðsmotorurin á rakettini er brendur út. Farleiðin hjá rakettini er stýrd av fysiskum lógum - eisini tyngdarkraftini - og ikki av til dømis GPS-navigatión.
Ritzau/Reuters
