Midt- og Vestjyllands Politi hevur í vikuni kannað eina hending umborð í einum donskum útróðrarbáti, har ein maður læt lív mánadagin. Útróðrarbáturin liggur í havnini í Thyborøn.
Danska løgreglan skrivaði á Tvitter í gjár, at fimm mans eru grundlógaravhoyrdir í rættinum í Holstebro. Teir eru allir skuldsettir fyri dráp og varðhaldsfongslaðir í fyribils fýra vikur.
Tað var mánamorgunin klokkan 05.12, at løgreglan fekk boðini um, at ein av manningini á útróðrarbátinum, Inger Katrine, sum var staddur í Norðsjónum, var lívleysur.
Tyrla var eftir manninum mánamorgunin, men hann varð staðfestur deyður, tá hann kom á sjúkrahúsið.
Umstøðurnar kring deyðsfallið gjørdu, at løgreglan vildi kanna málið. Orsakað av veðri, var ikki møguligt at fáa skip og manning í havn fyrr enn mikukvøldið í hesi vikuni.
Tað var heldur ikki møguligt at seta løgreglu umborð á bátin.
Eftir at útróðrarbáturin kom í havn, er manningin avhoyrd og teir fimm, sum manningin taldi, umframt hin deyða, vórðu í gjár til grundlógaravhoyr, skuldsettir fyri manndráp.
Ákæruvaldið vildi hava málið viðgjørt fyri afturlatnum hurðum.
Kriminalteknikarar hjá løgregluni hava gjørt kanningar umborð í útróðrarbátinum, og Midt- og Vestjyllands Politi sigur seg í tíðindaskrivi ikki hava fleiri viðmerkingar til málið í løtuni.
Danskir miðlar vita tó at siga, at teir fimm menninir, sum eru millum 25 og 41 ár, eru skuldsettir fyri í felag at hava bukað og kvalt mannin, sum læt lív. Maðurin, sum búði í Ringkøbing-Skjern kommunu, var sambært donskum miðlum nýggjur umborð á bátinum.
Teir fimm, sum rætturin í Holstebro gjørdi av at varðhaldsfongsla í fyribils fýra vikur, hava allir kært rættarúrskurðin.
Útróðrarbáturin, sum talan er um, er Inger Katrine.
Sambært donskum miðlum vísir líkskurðurin, at tekin eru um harðskap og kvalaratak. Tungubeinið á manninum var brotið, og hann hevði brotnan ryggjargeisla umframt nógvar løstir ymsastaðni um kropp og andlit.
Tí heldur danska løgreglan, at deyðsorsøkin er harðskapur og kvaling.
