Høgravendi tjóðarskaparflokkurin sær út til at gerast størsti flokkur í fyrsta umfari av valinum til tjóðartingið í Fraklandi í dag.
Flokkurin, sum fyrr var undir leiðslu av Marine Le Pen og sum í dag eru undir leiðslu Jordan Bardella, hevur 34 prosent av atkvøðunum.
Tað vísa kanningar á valstøðum frá fleiri greiningarstovnum, sum vórðu almannakunngjørdar eftir at valstøðini stongdu klokkan 20.
Vinstravenda samgongan The New People’s Front (NFP) sær út til at gerast tann næststørsta við 29 prosentum.
Sambært kanningini verður nummar trý á valinum valsamgongan Ensemble, sum millum annað er mannað við flokkinum hjá Emmanuel Macron forseta, Renaissance.
Samgongan kann rokna við millum 20,5 og 23 prosentum av atkvøðunum, vísa mátingarnar.
Marine Le Pen, sum er forkvinna í flokkinum í tjóðartinginum, fegnast um veljarakanningarnar á valstøðunum.
Samstundis sigur hon, at hon vónar ein absoluttan meiriluta, tá endaliga valúrslitið fyriliggur - og at hennara ungi floksforaður verður næsti forsætisráðharri í Fraklandi.
- Vit hava tørv á einum absolutum meiriluta fyri at Jordan Bardella verður útnevndur til forsætisráðharra av Emmanuel Macron um átta dagar, sigur hon, sambært sjónvarpsstøðini BFMTV, í sigursrøðu fyri sínum floksfelagum.
Um endaliga úrslitið endar við at staðfesta tølini, verður tað í tráð við tað, sum meiningarkanningar hava spátt undan valinum.
Enn er ógreitt, hvussu nógv valevni hava fingið tey neyðugu 50 prosentini av atkvøðunum fyri at verða vald í fyrsta valumfari.
Um eitt valevni ikki fær í minsta lagi 50 prosent av atkvøðunum í sínum valdømi, verður eitt seinna umfar næsta sunnudag. Tað verður um eina viku.
Fyrr í dag vístu tøl frá franska innanríkisráðnum, at valluttøkan sá út til at vera tann hægsta í áratíggju.
/ritzau/Reuters
