Nato-londini leita framvegis eftir einum persóni, ið skal taka um endan sum Nato-aðalskrivari fyri Jens Stoltenberg, tá hann leggur frá sær.
Ein kelda í Nato sigur við tíðindastovuna, NTB, at tað ikki er heilt óhugsandi, at norðmaðurin kanska vil sita í heita stólinum eitt vet útyvir ætlaðu tíðina.
Men, Jens Stoltenberg hevur fleiri ferðir gjørt greitt, at hann ynskir ikki at taka eitt skeið aftrat sum aðalskrivari í verjusamgonguni.
So seint sum í hesi vikuni segði hann, at hann ikki hevur aðrar ætlanir enn at gevast til heystar.
Keldan, sum NTB sipar til, sigur, at verður talan um leingjan, verður hetta í mesta lagi um mánaðir ella eitt hálvt ár.
Hin 4. apríl í 2024 verður Nato 75 ár, og fleiri miðlar hava víst á, at dagurin skal haldast við einum toppfundi í amerikanska høvuðsstaðnum, Washington.
Samstundis hevur verið víst á, at hetta hevði verið ein hóskandi dagur til leiðaraskifti í verjusamgonguni.
Í fjør segði Jens Stoltenberg frá sær starvið sum miðbankastjóri í Noregi og valdi eftir áheitan at halda fram sum Nato-aðalskrivari eitt ár aftrat.
Hann hevur áður í samrøðu við tíðindastovuna NTB sagt, at tað ikki er aktuelt at halda fram, tá tíðin hjá honum í Nato er av.
- Nei, tá skal eg aftur til Noregs, segði hann í januar í ár.
Jens Stoltenberg tók við starvinum sum Nato-aðalskrivari í 2014. Tvær ferðir er tíðarskeiðið hjá honum longt.
Norðmaðurin er nú við at gerast tann Nato-leiðari, sum hevur sitið longst í hesum starvi síðan Joseph Luns, sum var aðalskrivari í 12 ár - árini 1971 til 1984.
