Amerikanski bilaframleiðarin hevur síðani januar skorið av prísunum á bilum sínum.
Kortini er umsetningurin hjá felagnum í triðja ársfjórðingi hækkaður við níggju prosentum, um vit bera saman við sama ársfjórðing í 2022. Tað vísir roknskapurin fyri ársfjórðingin.
Tað er tó spakuligasti vøkstur í yvir trý ár sambært Reuters.
Umsetningurin endaði á 23,35 milliardir dollarar svarandi til eitt sindur meira enn 165 milliardir krónur.
Tað gav ein bruttovinning upp á slakar 30 milliardir krónur, vísir roknskapurin.
Tað eru 22 prosent minni enn samanborið við somu mánaðir í fjør.
Tesla heldur í roknskapinum fyri triðja ársfjórðing fast í endamálinum um at veita 1,8 milliónir bilar í 2023.
Harvið skal bilaframleiðari lata metnógvar bilar í fjórða ársfjórðingi. Tilsamans 476.000.
Tað hevur millum annað borið við sær, at Tesla síðani januar hevur fram príslækking upp á meira enn seks prosent av øllum bilsløgum.
Ein teirra er Model Y, sum er serliga vælumtóktur. Hann er mest seldi bilur í Danmark og mest seldi bilur kring heimin.
Ársfjórðingshagtølini um veitingar av bilum, sum varð almannakunngjørdur fyrst í oktober, gav stúran um, hvørt Tesla megnaði at koma á mál.
Hagtølini vóru í lægra enda vegna framleiðslusteðg í sambandi við dagføringar av verksmiðjum fleiri staðni, skrivar MarketWire.
Stjórin í Tesla, Elon Musk, hevur áður greitt frá, at hann heldur vildi tjena eitt sindur færri pengar fyri hvønn bil, um tað merkir, at hann kann fáa fleiri av vælumtóktu elbilunum á vegirnar.
Í roknsskapinum váttar felagið, at tann nýggi Cybertruck, sum er svarið hjá framleiðaranum upp á ein amerikanskan pickup, enn skal koma á marknaðin fyri nýggjár.
– Harumfram halda vit fram við at gera framstig við næsta ættarliðinum, stendur í roknskapinum.
Í Amerika hækkaði Tesla-partabrævið við 1,3 prosent í gjárkvøldið.
/ritzau/
