Tann 6. novembur, finna vit útav hvør hevur verið Ársins Áleypari 2024 hjá monnum. Tiltakið verður sent beinleiðis á FM1 komandi mikudag, frá kl. 17:00.Í kvøld kl. 19:00 sigur FM1 frá steypafinaluni á Tórsvølli, millum HB og B36.
Giljanes Bussar handar heiðurin til Ársins Áleypari 2024 hjá monnum.
Áki Samuelsen, HB
Hóast sín unga aldur, er Áki longu vorðin ein lyklaleikari í HB og tað var sjónligt, at HB var merkt av at Áki var skaddur, ein stóran part av seinasta triðinginum hetta kappingarárið. Yvir 19 dystir, bleiv tað til 12 mál hjá Áka og var hann eisini við frá byrjan, tá U-21 landsliðið hjá Føroyum vann 1-0 á Hvítarusland.
Áki hevði eisini ein týðandi leiklut fyri HB í topp 3 uppgerðunum í ár, har hann fekk trý málstig og kann í kvøld gerast steypavinnari, tá HB og B36 bresta saman á Tórsvølli, kl. 19:00.
- Áki hevur 15 málstig í Betri Deildini 2024
Petur Knudsen, NSÍ
NSÍ hevur skotið 54 mál í Betri Deildini 2024. Av teimum 54 málunum, hevur Petur skotið 15 og lagt upp til 19. Sostatt eigur kviki vongurin beinleiðis leiklut í 34 málum, ið svarar til heili 63% av øllum málum, NSÍ hevur skotið í ár. Um B36 ikki megnar at vinna steypafinaluna í kvøld, er Petur høvuðsorsøkin til at NSÍ spælur í Evropa komandi ár.
- Petur hevur 34 málstig í Betri Deildini 2024
Árni Frederiksberg, KÍ
Eitt vinstrabein í heimsklassa. Eyðkenda vinstrabeini og teknisku førleikarnir hava í longri tíð verið eftirspurdir av Føroyskum landsliðsvenjarum. Í ár, hevur Árni aftur víst hví hann telist millum bestu áleyparar og leikarum sum heild í Føroyskum fótbólti. Hann hevur skotið nýggju mál í ár og lagt upp til 15 í Betri deildini. Umframt framúr avrík í Føroyum, eru tað serliga hansara sjey mál í Evropa, ið vigað nógv í hesari tilnevning.
- Árni hevur 24 málstig í Betri Deildini 2024
Páll Klettskarð, KÍ
Eins og vín, so betrast 34 ára gamli Páll við aldrinum. Ein sonevndur málrevur ið við sínari snildheit ofta fær fótin fyrst á bóltin. Við 23 málum í Betri Deildini í ár, er Páll suverenur toppskjútti í 2024. Ongantíð áður hevur áleyparin megnað at skotið 23 mál í landskappingini og hevði hetta verið nokk at gerast toppskjútti í 2007, 08, 09, 10, 11, 12, 13, 14, 15, 16, 17, 18, 20, 22 og 23 av árunum, ið Páll hevur leikt í bestu deildini.
Við nýggja landliðstoyminum við klaksvíkinginum, Eyðun Klakstein á odda, verður spennandi at síggja um toppskjúttin í Føroyskum fótbólti verður úttikin komandi mánadag.
Páll varð 9 ferð kosin sum dagsins leikari á Dystir.fo og var sostatt ovast á listanum í ár.
- Páll hevur 28 málstig í Betri Deildini 2024
Olaf Bárðarson, Víkingur
Ein av teimum ungu og mest evnaríku leikarunum í Føroyskum fótbólti. Eins og Áki hevur skaðar eisini forða Olaf í vísa síni kynstur yvir eitt heilt kappingarár og hevur hann hóast hetta megnað 20 málstig í Betri Deildini 2024. Serliga eru tað hansara málstig móti topp 3 liðum í ár, ið hava gjørt hann týdningarmilan fyri Víking í ár. Ein av stóru profilunum á U-21 landsliðnum við óhugnaligari ferð, ið bara stendur og bíðar eftir sítt gjøgnumbrot til A-landsliðið.
- Olaf hevur 20 málstig í Betri Deildini 2024
Poul Kallsberg, Víkingur
Poul flutti til meistaraliðið í fjør og er ein av fáu leikarunum, ið ikki hava uppruna í Víkingi. Í ár, eru mál og upplegg eisini vorðin ein partur av hansara íkast til Víkingaspælið og er longur nógvur áhugi vístur av feløgum uttanlanda. Poul megnaði 12 mál og 14 upplegg í ár, ið ger hann til nummar trý á listanum yvir málstig í Betri Deildini 2024. Eins og viðleikaran á hinum vonginum, hevur Poul eisini fingið fýra málstig móti mótstøðuliðum í topp 3 hetta kappingarárið.
- Poul hevur 26 málstig í Betri Deildini 2024
Giljanes Bussar handar heiðurin til Ársins Áleypari 2024 hjá monnum.
Í morgin verða tilnevningarnar til Ársins Dómari 2024 hjá monnum kunngjørdar.
Hesi stuðla Ársins Leikari 2024:
Hilton Garden Inn
FSF
Atlantic Airways
JFK
Mowi
Kramm
Betri
LÍV
Jysk
Wenzel
JP Byggivirkið
Giljanes Bussar
BEPRO
Niels L. Arge
Fílurin
Norðoya Sparikassi
Runavíkar Kommuna
Eysturkommuna
Tórshavnar Kommuna
Klaksvíkar Kommuna
Nes Kommuna
Fuglafjarðar Kommuna
