Fýra partrolarapør eru í løtuni til fiskiskap eftir upsa. Skipini fáa eisini nakað av hjáveiði, eitt nú longu, hýsu og tosk.
- Fiskiskapurin eftir upsa er smáligur, siga tey á Fiskamarknaði Føroya.
Og soleiðis hevur verið í langa tíð - fyri ikki at siga í nøkur ár.
Í løtuni er bara ein djúpvatnstrolari til fiskiskap. Teir koma væntandi inn at landa fyrst í næstu viku.
- Teir hava svartkalva og kongafisk, verður lagt aftrat.
Allir teir smáu trolbátarnir liggja við bryggju í løtuni, men onkur fer væntandi útaftur í næstum.
Tvey garnaskip fiska svartkalva, og tvey fiska havtasku.
- Skipini hava brúkiligan fiskiskap, og øll landa í næstu viku, verður lagt aftrat.
