Tað fór ein steinur av herðunum hjá øllum fótbóltsáhugaðum íslendingum, tá Klæmint A. Olsen og liðfelagarnir í Breiðablik megnaðu at vinna seg í bólkaspælið í Europa Conference League.
Aftaná samanlagda 2-0 Play Off sigurin á Struga úr Norðurmakedonia gjørdist Breiðablik fyrsta íslendska fótbóltsliðið at vinna seg í eitt evropeiskt bólkaspæl. Tað legði eisini eitt jaligt trýst á Breiðablík, at KÍ hevði megnað setningin nakrar vikur frammanundan.
Í kvøld klokkan 20 spælir Breiðablik fyrsta dystin í bólki B.
Dysturin verður á útivølli í Ísrael móti Maccabi Tel Aviv. Hini liðini í bólkinum eru Zorya Luhansk úr Ukraina og Gent úr Belgia.
Maccabi Tel Aviv er risastórur favorittur til at vinna á Breiðablik í kvøld. Miðaloddsini upp á sigur til Maccabi Tel Aviv eru 1,14. Miðaloddsini upp á sigur til Breiðablik eru heili 19,0.
Breiðablik hevur staðið seg væl á heimavølli í evropeisku dystunum í summar, men hevur fingið nakrar upp á kassan á útivølli. Í útidystinum móti bosniska liðnum, Zrinjski í Europa League undankappingini tapti Breiðablik 2-6. Og í útidystinum í Champions League undankappingini móti FC Keypmannahavn tapti Breiðablik 3-6.
