Høvuðsvenjarin hjá Víkingi Reykjavík, Arnar Gunnlaugsson valdi at hvíla Gunnar Vatnhamar og aðrar leikarar, tá Víkingur í kvøld tók ímóti KR á heimavølli.
Víkingur kundi við einum sigri staðfesta meistaraheitið, men tað endaði við javnleiki 2-2. Víkingur kom eitt stig nærri meistaraheitinum, men feiringin má bíða nakrar dagar.
Nú fýra dystir eru eftir at leika hevur Víkingur á fyrsta plássinum 60 stig, og Valur á øðrum plássinum 48 stig. Víkingur skal bert hava eitt stig í teimum komandi fýra dystunum, so eru teir staðfestir meistarar.
Víkingur verður eisini staðfestur meistari um Valur bara snávar í einum av teimum komandi fýra dystunum teir skulu spæla.
Aron Elís Þrándarson og Danijel Dejan Djuric løgdu Víking framum 1-0 og 2-0 undan steðginum, og Víkingur var á meistarakós.
Men við málum hjá Benoný Breka Andréssyni og Kristinn Jónssyni í seinna hálvleiki fekk KR útsett meistaraskapsveitsluna hjá Víkingi.
Komandi mánakvøld klokkan 20.15 spælir Víkingur á útivølli í Kópavogi móti liðnum hjá Klæminti A. Olsen, Breiðablik sum tá er komið aftur frá langari ferð í Ísrael. Breiðablik spælir móti Maccabi Tel Aviv í Europa Conference League í annaðkvøld klokkan 20.
Fær Víkingur eitt stig móti Breiðablik, ella snávar Valur á útivølli móti KR dagin fyri verður Víkingur staðfestur íslendskur meistari.
Støðan í ovara endaspælinum
Nr | Lið: | Dystir | V | J | T | Málmunur | Stig |
1 | Víkingur Reykjavík | 23 | 19 | 3 | 1 | 67:22 | 60 |
2 | Valur | 23 | 15 | 3 | 5 | 55:25 | 48 |
3 | Breiðablik | 23 | 11 | 5 | 7 | 44:38 | 38 |
4 | FH | 23 | 11 | 4 | 8 | 43:44 | 37 |
5 | Stjarnan | 23 | 10 | 4 | 9 | 45:27 | 34 |
6 | KR | 23 | 9 | 6 | 8 | 31:38 | 33 |