Aftaná at hava verið ósigraðir í fimm dystum vóru Gilli R. Sørensen og liðfelagarnir í Odd fyri stórtapi ígjár.

Odd vitjaði oddaliðið í bestu norsku fótbóltsdeildini, Molde sum vann stórsigur 5-0 á Odd. Longu tá ein hálvur tími var farin var Molde á odda 3-0.

Gilli R. Sørensen spældi allan dystin, og hann var við til at skapa ein stóran málmøguleika tá støðan var 3-0, men hann var tíverri misnýttur.

Odd er nummar átta av teimum 16 liðunum í deildini við 16 stigum. Fimm stig eru upp til Vålerenga á triðja plássinum, ið gevur møguleikan at spæla í Evropa næsta summar.

Komandi leygardag tekur Odd móti Viking Stavanger.

Á hesari leinkjuni ber til at síggja hæddarpunktini frá dystinum millum Molde og Odd: https://www.odd.no/video