Landsliðsleikarin, Vilhelm Poulsen og liðfelagarnir í Lemvig-Thyborøn ferðaðust í dag úr Jútlandi til Fjón fyri at spæla dyst móti toppliðnum, GOG í bestu donsku hondbóltsdeildini.
GOG vann stórsigur 38-27. Í steðginum var heimaliðið á odda 19-12.
Persónliga stóð Vilhelm seg væl. Hann gjørdist toppskjútti hjá Lemvig-Thyborøn við seks málum, og hann legði upp til fýra onnur mál.
Lemvig-Thyborøn er aftast í deildini við bert 11 stigum nú bert tveir dystir eru eftir at spæla. Og tað sær svart út hjá Lemvig-Thyborøn at sleppa undan aftasta plássinum, ið merkir beinleiðis niðurflyting til næstbestu deildina. Nordsjælland hevur 14 stig og Kolding hevur 15 stig.
Mikukvøldið 20. mars hevur Lemvig-Thyborøn heimadyst móti Kolding, og tá kunnu teir hála tvey stig inn á Kolding. Trupuleikin er bara, at Lemvig-Thyborøn hevur seinasta dystin móti oddaliðnum, Aalborg á útivølli, og tað skal eitt stórt undur til at vinna tann dystin. Fyrst mugu Vilhelm og liðfelagarnir so vinna á Kolding, og so mugu teir taka tað harfrá.
Støðan:
Nummar | Lið | Dystir | Stig |
---|---|---|---|
1 | Aalborg | 24 | 42 |
2 | Fredericia | 24 | 35 |
3 | Bjerringbro/Silkeborg | 24 | 31 |
4 | GOG | 24 | 29 |
5 | Mors-Thy | 24 | 29 |
6 | Skjern Håndbold | 24 | 25 |
7 | TMS Ringsted | 24 | 24 |
8 | Ribe-Esbjerg | 24 | 23 |
9 | SønderjyskE | 24 | 20 |
10 | Skanderborg AGF | 24 | 20 |
11 | TTH | 24 | 18 |
12 | KIF Kolding | 24 | 15 |
13 | Nordsjælland | 24 | 14 |
14 | Lemvig-Thyborøn | 24 | 11 |