Kjak hevur verið í síðstuni um, hvørt vit skulu endurnýggja fiskiveiðisáttmálan við Rusland ella ei, og tað av góðum grundum. Rusland hevur gjørt innrás í grannalandið Ukraina, sum er eitt sjálvstøðugt, frælst og demokratiskt land. Eg taki frástøðu frá hesum og fordømi tað uppá tað allarharðasta, og trúgvi at føroyingar flestir gera tað eisini.
Eg meti tó ikki, at vit skulu steðga fiskivinnusamstarvinum við Rusland av hesi orsøk, tí her er talan um matvørusamstarv. Bæði ES, ST og Joe Biden forseti í USA siga, at samhandil við matvørum við Rusland skal ikki boykottast. Norra hevur framvegis fiskivinnusamstarv við Rusland. Eg síggi tí onga meining í, at lítlu Føroyar skulu boykotta Rusland, tá bæði ES, ST og forseti í USA mæla frá hesum. Heldur ikki næsti granni okkara Norra ætlar sær at steðga fiskivinnusamstarvinum við Russar.
Føroyingar hava fiskað í Barentshavinum í mong harrans ár og næstan líka so leingi hevur Rusland verið í kríggi við onkran. Ongin hevur tó tosað um, at vit skulu steðga fiskivinnusamstarvinum av tí orsøk.
Fiskivinnusamstarvið hjá Føroyum við Rusland hevur stóran búskaparligan týdning fyri okkum og serliga stóran týdning hava Barentshavstrolarnir fyri Klaksvík og Eysturoy. Her eru reiðaríir, sum hava fiskað í Barentshavinum, síðani vit byrjaðu fiskiskapin har og hava fiska har øll árini uttan íslit. Síðani fólkaflokkurin syrgdi fyri tryggum kørmum til fiskivinnuna, hava hesi reiðaríir gjørt stórar íløgur í kostnaðarmikil spildurnýggj skip til fiskiskapin har. Íløgur fyri 100-tals milliónir. Her eru talan um nógv arbeiðspláss og inntøkugrundarlagi hjá fyritøkum og nógvum familjum.
Um vit skulu steðga fiskivinnusamstarvinum við Rusland, so skulu nýggju barentshavstrolarnir leggja um til at fiska russisku kvotuna av uppisjóvarfiski í føroyskum sjógvi. Hetta ber sjálvsagt til, men kostar, og við tí kemur allur hesin stóri flotin at fiska uppisjóvarfisk við Føroyar. Hetta ger fiskivinnuna sera einstáttaða og meir viðbrekna. Um fiskiskapurin eftir uppisjóvarfiski við Føroyar svíkur, so verður talan um eitt stórt bakkast. Tá kunnu vit neyvan vænta okkum sama vælferðarsamfelagið, sum vit hava í dag. Best er, at okkara fiskifloti troytir ymisk fiskasløg á ymsum leiðum.
Tað sýnist sum Fólkaflokkurin er einasti flokkur, sum veruliga sær, hvussu stóran týdning okkara fiskivinna hevur - á bæði fjar og nærleiðum. At hon saman við alivinnuni og avleiddum vinnum eru grundarlagið undir vælferðarsamfelagnum. Uttan hesar vinnur høvdu vit ikki tað vælferðarsamfelagi, sum vit hava í dag.
X Fólkaflokkin
X við Elsebeth Mercedis Gunnleygsdóttur.
