Landsstýrið í Grønlandi kunngjørdi á heimasíðuni mikudagin, at ein falskur persónur á sosiala miðlinum X ger seg inn á grønlendska stjórnarleiðaran, Múte B. Egede.
Í svari til eitt uppslag frá milliarderinum og Donald Trump-stuðlinum Elon Musk stendur í falska profilinum fylgjandi, sum er ætlað Musk og USA:
– Fáið tykkara skitnu hendur av okkara landi. Grønland er frælst og verður framvegis frælst.
Grønlendska landsstýrið boðar tí frá, at profilurin er falskur.
- Tað er ein falskur profilur, sum ger seg inn á formannin í grønlendska landsstýrinum. Vinarliga síggið burtur frá uppslagnum, skrivar landsstýrið.
Komandi amerikanski forsetin, Donald Trump, vil hava amerikanskt ræði og ognarrætt í Grønlandi – eitt krav, sum Múte B. Egede - tann veruligi - avgjørt hevur vrakað.
- Vit vilja ikki vera amerikanarar, og vit vilja heldur ikki vera danir. - Vit vilja vera grønlendingar, segði hann fríggjakvøldið við amerikansku sjónvarpsrásina Fox News.
Samrøðan kom í lag eftir umrøðurnar í síðstu viku um Grønland og almennu útsagnirnar hjá Donald Trump um at innlima landið í okkurt slag av nýggjum norðuramerikanskum stati saman við USA og Kanada.
Trump vil gera Grønland "stórt aftur" - eitt orðaspæl við hansara slagorði um at gera Amerika stórt aftur.
Hann hevur eisini sagt, at letur Danmark ikki Grønland til USA, fer hann at seta revsitoll á danskar vørur.
Alt málið hevur elvt til eina stóra uttanríkispolitiska kreppu, har USA, Danmark og Grønland eru við.
Hósdagin kunnaði Mette Frederiksen, forsætisráðfrú, uttanríkispolitisku nevndina í fólkatinginum um herdu støðuna. Hetta hendi dagin eftir, at hon hevði eina 45 minuttir langa samrøðu við Donald Trump í telefonini.
Komandi forsetin er eftir øllum at døma sera spentur at náa sínum ætlanum um at fáa valdið á Grønlandi, sum hann eisini ynskti sum forseti í 2019.
Mánadagin verður Donald Trump innsettur sum forseti í USA fyri aðru ferð.
/Ritzau/
