Lutakastið til evropisku flogbólts-kappingarnar fyri lið er júst liðugt. Her gjørdist greitt, at kvinnurnar hjá fleyr skulu til Háland í oktober, skrivar Flogbóltssambandið.
Hetta er fyrsta ferðin, at Fleyr luttekur í altjóða CEV kapping. Flogbóltsfelagið Dráttur vann í 2023/2024 bæði Bónus-kappingina og Føroya Tele-kappingina. Men tá Dráttur ikki ynskti at taka lut í evropiskari kapping í 2024, tóku silvurvinnararnir úr Fleyr av og meldaði teirra kvinnulið til.
Verturin Nirisha Campbell og hjáverturin Federico Ferraro stóðu fyri lutakastinum, sum gekk fyri seg í Luksemborg Broadcasting Center.
Fleyr skal fyrst leika útidyst ímóti Friso SNEEK frá Hálandi. Fyrsti dysturin hjá Fleyr verður í døgunum 8. - 10 oktober. Returdysturin í høllini á Hálsi verður so 15. - 17. oktober. Endaliga dagfestingin verður ásett seinni í vikuni.
