Ein seks daga long statsjarðarferð hjá fyrrverandi amerikanska forsetanum, Jimmy Carter, er byrjað í heimbygdini Plains í Georgia.
Kista hansara, sum var klødd við amerikonskum flaggi, varð borin í ein svartan líkvogn av bæði núverandi og fyrrverandi umboðum hjá Secret Service, sum veittu fyrrverandi forsetanum trygd.
Kistan við deyða Carter verður koyrd spakuliga gjøgnum býin, har flagg veittra á hálvari stong.
Fylgið fór eisini framvið barndómsheiminum hjá Jimmy Carter á einum bóndagarði í Plains - ein lítil býur við einans 552 fólkum í 2023.
Tá svarti líkvognurin steðgaði á framman fyri jarðnøtagarðinum hjá Carter-familjuni, ringdi ein klokka 39 ferðir til heiðurs fyri 39. forsetan í USA.
Burtursæð frá árunum í Washington D.C. búði Jimmy Carter í Plains meginpartin av lívinum saman við konu síni, Rosalynn Carter. Hon doyði í november 2023.
Hjúnini giftust í 1946, og hátíðarhildu sostatt 77 ár saman.
Á leiðini, sum jarðarferðin gongur, hava fólk staðið við fløggum at siga seinasta fyrrverandi forsetanum farvæl.
Jimmy Carter var, til síni seinastu ár, sjúkur av krabbameini og veikur av elli, partur av Plains samfelagnum.
- Hann var eitt heilt vanligt menniskja. Vit fara at sakna hann, sigur 71 ára gamli William Brown, sum møtti upp í Plains fyri at vísa Carter sína seinastu virðing.
Seinni í dag verður gudstænasta í Atlanta, høvuðsstaðnum í Georgia. Kistan hjá Carter skal standa til mánadagin, so syrgjandi úr heimstati hansara kunnu vísa sína seinastu virðing.
Síðani verður kistan flutt til Capitol-bygningin í Washington, D.C. sum liður í offisiellu statsjarðarferðini hjá 39. forsetanum í USA.
Carter gerst 13. fyrrverandi amerikanski forsetin, sum liggur í einum sokallaðum castrum doloris í kongressbygninginum, sum kallast Capitol. Abraham Lincoln, sum varð dripin í 1865, var tann fyrsti.
##med2##
Carter, fyrrverandi jarðnøtabóndi og guvernørur, var forseti í USA frá 1976 til 1980.
Jimmy Carter andaðist 29. desember 100 ára gamal. Hann er longst livandi fyrrverandi forsetin, sum USA nakrantíð hevur havt.
/Ritzau/
