Eitt innlegg hjá tøknimilliarderinum Elon Musk, har hann vísir stuðul til høgravenda týska flokkin AfD, hevur elvt til stórar umrøður í blaðnum Die Welt.
Á X skrivar kjakredaktørurin Eva Marie Kogel í dag, at hon hevur lagt frá sær.
Tað hevur hon gjørt, hóast henni altíð hevur "dámt" at standa fyri kjakredaktiónini.
- Í dag er ein grein eftir Elon Musk útgivin í Welt am Sonntag. Í gjár boðaði eg frá, at eg legði frá mær eftir prentingina, skrivar hon.
Musk, sum í USA er tætt knýttur at komandi Trump-stjórnini, vísti fyri stuttum almennan stuðul til Alternative für Deutschland (AfD) við einum stuttum uppslagi á sosiala miðlinum X, har tað stendur, at bert AfD "kann bjarga Týsklandi".
Val er í Týsklandi 23. februar, og brádliga uppíblandingin hjá stjóranum í Tesla í týska valið varð nógv umrødd.
Í kjakgreinini í Die Welt argumenterar hann fyri sínum stuðli til flokkin, sum fregnartænastan í Týsklandi hevur illgruna um at vera ein høgravendur ekstremistiskur felagsskapur.
Musk heldur, at AfD stendur fyri "politiskari realismu". Hann tosar um, at Týskland er á "búskaparligum og mentanarligum forfall". Í eygunum á Musk hevur AfD røttu tilgongdina, eisini viðvíkjandi búskapi og fólkaflyting.
AfD er fyri harðari herðing av tilflytarapolitikkinum í Týsklandi.
Fleiri journalistar hjá Die Welt, sum verður mett at vera konservativt, hava eisini víst sína ónøgd, sambært týsku tíðindastovuni dpa.
Útgevarin av Die Welt, Axel Springer, hevur sent boð frá ábyrgdarblaðstjóranum Ulf Poschardt til dpa.
- Aktuella kjakið um tekstin hjá Elon Musk er sera avdúkandi, stendur í henni.
- Fólkaræði og journalistikkur blóma undir talufrælsinum.
Saman við greinini hjá Elon Musk hevur blaðið almannakunngjørt ein tekst hjá komandi ábyrgdarblaðstjóranum, Jan Philipp Burgard, sum sigur "at diagnosan hjá Musk er røtt, men at hansara tilgongd til viðgerð - at bara AfD kann bjarga Týsklandi - er blóð skeiv".
Sambært seinastu meiningakanningunum vildu yvir 30 prosent av týskarum atkvøtt fyri konservativa CDU-flokkinum, um val verður í morgin. AfD er á øðrum plássi við 19 prosentum av atkvøðunum.
/Ritzau/
