Tilmælið er, at tað í mesta lagi verða fiskað 150.000 tons av rækjum í Barentshavinum í 2025. Tað er 7.000 tons meira enn tilmælið fyri 2024.
Hetta veit www.kystmagasinet.no at siga.
- Rækjustovnurin í Barentshavinum er støðugur á einum rímiliga høgum støði, sigur havgranskarin, Fabian Zimmermann.
Sambært heimasíðuni er tað norsk-russiska fiskivinnunevndin, sum kemur við kvoturáðnum.
- Tað er í dag eingin samlað mestakvota fyri rækjuveiðina í Barentshavinum, og tí hava kvoturáðini eisini avmarkaðan týdning.
Fabian Zimmermann vísir á, at meginparturin av norsku rækjuveiðini fer fram í Barentshavinum.
Men, seinnu árini eru fleiri lond farin at fiska rækjur um hesar leiðir.
- Vit síggja landingar bæði í Noregi, Russlandi, og serliga eru tað ES-skip, sum eru vorðin fleiri seinnu árini.
Havgranskarin sigur, at áhugin fyri rækjuveiðini er øktur munandi, eftir at kvotuskerjingar hava verið á øðrum fiskasløgum í Barentshavinum.
Veiðan av rækjum hevur tó verið væl minni enn kvotutilmælini.
- Í 2024 var tilráðingin 143.000 tons, men veiðan var einans 83.000 tons, og í 2023 var rækjuveiðan í Barentshavinum 73.000 tons, veit www.kystmagasinet.no at siga.
