Eitt altjóða granskingarlið kann nú fyrireika seg til at fáa meira vitan um savnið av mumium, mannaleivdum og gravum á oynni Uunartoq í Suðurgrønlandi.
Sermitsiaq veit í dag at siga, at Grønlands Nationalmuseum & Arkiv fær 4,5 milliónir úr Augustinus Grunninum til eina stóra granskingarverkætlan.
Verkætlanin verður rópt "Angerlartunnguit - Genfødte: Forskning, genforening og genskabelse af Thule Inuit fra Uunartoq".
Á grønlendska tjóðarsavninum fegnast tey sjálvsagt um játtanina, sum skapar møguleikar fyri hesum altjóða granskingarsamstarvi.
- Nú skulu vit finna út av, hvørji hesi fólkini vóru, og vit fara at royna at endurskapa teirra lív og levnað, sigur leiðarin á savninum, fornfrøðingurin, Christian Koch Madsen.
Hann vísir á, at slíkar mumiur geva ein einastandandi møguleika at læra um fortíðina, eitt nú um klæðir, mat og heilsu á búplássinum í fornari tíð.
- At læra og fortelja um hesi menniskju er eisini ein háttur at heiðra tey, leggur hann dent á.
Ætlanin er, at verkætlanin, sum verður sett í gongd næsta ár, skal vara fram til 2027, og talan verður um eitt samstarv tvørtur um landamørk.
Tað var fyrr í ár, at balsameraðu líkini av grønlendsku oynni Uunartoq komu heimaftur úr USA.
- Í fyrstu syfti komu tey til Danmarkar, tí umstøður vóru ikki at taka ímóti teimum í Nuuk, hagar tey seinnu eru komin, veit Sermitsiaq at siga.
