Í dag, mánadagin 21. august, fyllir Óli Jacobsen 80 ár. Vit í Miðlahúsinum hava havt stóra gleði av at hava Óla ímillum okkara, síðan hann byrjaði at skriva siðsøguligt tilfar til Sosialin. Hann býr í grannalagnum og skrivar heima, men kemur hvørja viku inn á redaktiónina við myndum og øðrum tilfari. Tá fæst altíð eitt hugaligt prát. Hóast Óli hevur skrivað mangt lesarabræv og viðmerkingar í Sosialinum ta tíðina, hann var formaður í Fiskimannafelagnum, so byrjaði siðsøguliga skrivingin í FF-blaðnum.
Óli hevur altíð okkurt áhugavert at práta um og hevur stóran áhuga fyri sínum medmenniskjum. Hann veit alt um fólk og familjur. Tá nýggj fólk koma í húsið, er hann beinanvegin áhugaður í hvørji tey eru, familju o.s.v. Hann hevur nógvar trúgvar lesarar um alt landið, og hevur hann vakt áhuga millum fólk fyri tí søguliga. Hann hevur sett lív í gamla kirkjugarð í Havn við sínum áhugaverdu greinum, sum allar eru at fínna á heimasíðu hansara og undir “Talgildir kirkjugarðar” hjá Tórshavnar Kommunu.
Meðan hann skrivar til Sosialin hvørja viku, er hann samstundis í gongd við at onkra bók. Hann hevur givið fleiri bøkur út um t.d. Elsu Jacobsen, ið var trúboðari í Ethopia, dagbókina hjá Petur Alberg, endurminningar hjá Annu Evensen, bøkur um J. F. Kjølbro, Njál Djurhuus og Kristian Djurhuus, kvinnusøgur um gerandislívið í 20. øld, bókin “Havið tók teir” og søgan um Dollan, havnarmannin sum broytti heimssøguna.
Uttan Óla høvdu vit verið nógv fátækari sum tjóð hvat tí mentanarliga og søguliga viðvíkur.
Óli varð føddur í Kalundborg á Sælandi í 1943. Í 1950 flutti hann við foreldrum og systkjum til Norðagøtu at búgva. Átta ár seinni fór hann til skips við slupp, og júst fiskiskapurin hevur fylt nógv í lívinum hjá Óla.
##med2##
Í 1966 kom hann í nevndina í Føroya Fiskimannafelag, har hann síðani sat sum formaður frá 1971 – 2007, við undantaki av einum góðum ári sum landsstýrismaður. Óli sat á tingi frá 1994 – 1998 fyri Verkamannafylkingina – eisini eitt skifti fyri Javnaðarflokkin í 1979. Sum formaður í Fiskimannafelagnum var hann eisini blaðstjóri á FF-blaðnum.
Óli hevur ongantíð havt koyrikort og heldur ongantíð koyrt bil. Hóast konan og børnini hava koyrikort, og bilur er í húsinum, hevur hann ongantíð havt ætlanir um at taka koyrikort.
Óli Jacobsen er giftur við Kirstin f. Nielsen av Eiði. Tey eiga børnini Lindu, Kára, Óli Jákup og Trónd umframt ommu- og abbabørn.
Vit ynskja Óla hjartaliga tillukku við føðingardegnum.
Starvsfelagar í Miðlahúsinum
