Seinastu dagarnar hevur Donald Trump víst nýggjan áhuga fyri at fáa Grønland undir amerikanskt vald.
Á einum tíðindafundi týsdagin segði Trump, at hann ikki kann útihýsa at brúka búskaparligan ella hernaðarligan tvingsil til at fáa vald á Panamaveitini í Miðamerika og Grønlandi.
Her er eitt yvirlit yvir, hvussu nakrir av heimsins leiðarum og ráðharrum hava svarað:
* Amerikanski uttanríkisráðharrin, Antony Blinken:
- Tað er nakað, sum ikki fer at henda. So vit skulu ikki spilla meira tíð uppá at tosa um tað, segði uttanríkisráðharrin, sambært AP.
* Franski uttanríkisráðharrin, Jean-Noël Barrot:
- Halda vit, at USA fer at herja á Grønland? Svarið er "nei", men um vit halda, at vit eru farin inn í eitt tíðarskeið, har tey sterkastu avgera, so er svarið "Ja", sigur hann, sambært AP.
* Týski kanslarin, Olaf Scholz:
- Í mínum samrøðum við evropeisku samstarvsfelagar okkara hevur verið eitt vantandi forstáilsi fyri seinastu útsøgnunum frá USA.
- Meginreglan um friðhalgaðu mørk okkara er galdandi fyri øll lond, uttan mun til um tey eru eystan ella vestan fyri okkum, sigur Scholz sambært Reuters.
* Noregs forsætisráðharri, Jonas Gahr Støre:
- Aftur nakrar leysar útsagnir, men tað er ein eitt sindur serligur nýggjur stílur, sigur hann við NTB.
- Sum danski forsætisráðharrin sigur, so skal Grønland taka síni egnu val. Og ríkisfelagsskapurin, sum Grønland er partur av, fevnir eisini um Danmark, sum eisini kann tala fyri seg.
* Talsmaðurin í ES-nevndini fyri handil, Olaf Gill:
- Lat okkum sláa tað eitt sindur niður her. Vit tosa um rættiliga hypotetisk ting og um eina umsiting, sum enn ikki hevur tikið við, sigur hann á tíðindafundi í dag.
- Vit eru til reiðar at verja okkara áhugamál á handli og øðrum økjum.
/Ritzau/
