Tað eru bara tvey størri ísfiskalínuskip eftir í flotanum. Síðan eru nøkur smærri ísfiskaskip, sum hava egningamaskinu.
Eitt av teimum størru ísfiskalínuskipunum fiskar í løtuni undir Føroyum og fær mest av hýsu og nakað av toski.
- Hitt ísfiskalínuskipið liggur við bryggju, vita tey á Fiskamarknaði Føroya at siga.
Av frystilínuskipunum, sum nú eru fleiri í tali, fiska seks undir Føroyum, eitt er á Íslandsrygginum, tvey eru í Grønlandi, og eitt er á Flemish Kap.
- Skipini fáa eina blanding av toski, longu, brosmu og so nakað av svartkalva, siga tey á Fiskamarknaði Føroya.
Um útlitini til útróður hesa vikuna verður sagt, at streymurin verður brúkiligur.
- Veðurvánirnar eru eisini brúkiligar, so vit vænta, at nakað verður av útróðri í vikuni, verður lagt aftrat.
