Í Georgia er fólkaveitsla, og fagnaðurin fær ongan enda.
Georgia hevur á fyrsta sinni nakrantíð vunnið seg til EM-endaspælið í fótbólti.
Georgia spældi Nations League Play Off finalu móti Grikkalandi í Tblisi um rættin at kappast í EM-endaspælinum í Týsklandi í summar.
Aftaná 120 minuttirs spæl var støðan framvegis javnleikur 0-0, og so var neyðugt við brotssparkskapping.
Giorgi Mamardashvili gjørdist stóra hetjan hjá Georgia við at bjarga tveimum brotsspørkum hjá Grikkalandi. Grikkaland skoraði bert upp á tvey av fýra brotsspørkum, meðan Georgia setti fýra av fimm í neti, og so kundi tann helst størsta veitslan í Georgia nakrantíð byrja.
##med2##
Georgia er í innleiðandi bólki F saman við Portugal, Kekkia og Turkalandi.
Fyri Grikkaland er talan um mest vanlukkuliga tapið síðani 0-1 og 1-2 tapini fyri Føroyum í 2014 og í 2015. Grikkaland hevur ikki vunnið seg til eitt EM-endaspæl síðani 2012.
UEFA loyvir ikki hæddarpunktum á YouTube, men har sæst fagnaðurin frá tí, at Nika Kvekveskiri hevur sett avgerandi brotsparkið í netið fyri Georgia. Rørandi at síggja so ektaða gleði:
##med3##
