Tað gongur væl hjá liðnum hjá Vilhelmi Poulsen í týsku bundesliguni. Hannover-Burgdorf var avgjørt ikki millum favorittarnar at vinna bundesliguna, men aftaná 11 teir fyrstu dystirnar er Hannover saman við Melsungen fremst í bundesliguni við 18 stigum. Bert málmunurin skilir Hannover frá fyrsta plássinum.
Í dag eydnaðist tað Hannover á heimavølli í ZAG Arena høllini at vinna 28-27 á verandi meistarunum, Magdeburg. Í steðginum var støðan javnleikur 14-14.
Magdeburg var á odda 27-23, men við einum fantastiskum endaspurti eydnaðist tað Hannover at skjóta fimm mál uttan, at Magdeburg megnaði at svara aftur.
Liðið hjá Jóhan á Plógv Hansen, Flensburg-Handewitt vann á heimavølli 36-27 (17-14) á Lemgo.
Flensburg er við 17 stigum eitt stig aftanfyri Melsungen og Hannover.
Ígjár vann THW Kiel uttan Elias Ellefsen á Skipagøtu 30-24 (16-15) á Gummersbach á útivølli.
Kiel er nummar seks í deildini við 14 stigum.
