Ingilín Didriksen Strøm hevur nú lagt frá sær sum landsstýriskvinna. Tað gjørdi hon, tá Erling Eidesgaard og Liljan Weihe úr Tjóðveldi boðaðu frá, at tey ikki hava álit á landsstýriskvinnuni, og at tey fóru at taka undir við misálitisuppskotinum.
– Eg veit, at tvey tingfólk úr Tjóðveldi taka undir við misálitinum. Eg dugi at telja og síggi, at eg havi mist álitið hjá Løgtinginum.
– Eg havi veruliga ikki tilvitað logið fyri Føroya Løgtingi ella Føroya fólki. Men eg má boyggja meg fyri, at Løgtingið ikki hevur álit á mær, segði hon og boðaði frá, at hon hevur biðið løgmann loyst seg úr embætinum.
