39 ára gamli stjørnuleikarin í amerikansku kurvabóltsliguni, NBA, LeBron James hevur tikið enn eitt ótrúligt met.
Tá lið hansara, Los Angeles Lakers vann 113-100 á Sacramento Kings kundi staðfestast, at LeBron James hevur spælt 57.447 minuttir í dystum í NBA. Tað hevur eingin annar megnað undan honum.
Gamla metið átti Kareem Abdul-Jabbars, ið setti gamla metið í 1989.
Í 2023 tók LeBron James eitt annað met frá Kareem Abdul-Jabbars við at gerast mest skorandi leikarin í søguni hjá NBA.
LeBron James sigur við BBC, at tað er hansara nærleiki, kærleiki og passión til kurvabólt, ið ger, at hann megnar at fremja slík brøgd.
