Mánadagin 21. oktober skrivaðu Per Martin Gregersen, borgarstjóri og Rúni Ólason, stjóri í Grønt & Grátt undir sáttmála um gerð av gongubreyt fram við vegnum við Ánna í Norðragøtu.
Talan er um gongubreyt frá krossinum og norður um Rokoko. Arbeiðið er liður í at betra um viðurskiftini hjá fólki til gongu, skrivar Eysturkommuna.
Arbeiðið er teknað og projekterað av Henning Larsen arkitektum. Stórur dentur er lagdur á at gera gongubreytina so náttúrliga sum gjørligt. Hetta merkir, at partar av gøtuni fara út í lendið og verða sostatt eitt slag av lendisgøtu. Harumframt verður plantað fram við gongubreytini og ymisk trivnaðarøki gjørd oman móti áarbakkanum.
Eftir ætlan fer arbeiðið í gongd í november í ár og verður liðugt móti sumri 2025.
