Longu síðsta leygardag var tað greitt, at FC Suðuroy fer at flyta upp í bestu deildina.
Í dag setti FC Suðuroy punktum á Vágseiði. Tað var ímóti teimum næstbestu hjá NSÍ.
Úrslitið var, at FC Suðuroy vann 5-0 eftir 2-0 í fyrra hálvleiki. Nú er tað Róin Schrøder, formaður í kappingarnevndini hjá FSF, sum handar FC Suðuroy spælarunum silvurkrónur fyri at enda næstfremst í 1. deild.
Salmundur Bech skoraði til 1-0 í 9. minutti. Tað var eftir horna úr vinstru.
Í 21. minutti var tað Fríði Holm, sum økti um munin til 2-0. Tað var eftir innlegg úr høgru.
Í 69. minutti var tað Pætur Augustinussen, sum skoraði til 3-0 eftir innlegg úr vinstru frá John Villi Wøldike Leo, og sjey minuttir undan leikloki varð Pætur Augustinussen tvífaldur málskjútti, tá ið hann varð leysur mitt fyri málinum.
Klokkan var farin tveir minuttir út um vanligu leiktíðina, tá ið Fríði Holm eftir uppspæl í høgru staðfesti 5-0 sigurin.
