– Ríkisfelagsskapurin er eitt samstarv millum trý lond, trý fólk, tríggjar tjóðir og trý mál.
Soleiðis segði Mette Frederiksen, forsætisráðfrú, í setanarrøðu á Fólkatingi 3. oktober í 2023.
Hóast ósemju um stjórnarviðurskiftini í Føroyum alla ta tíð, vit hava havt heimastýri, so tykist semjan ongantíð so sannlík, sum júst nú.
Í røðu síni á ólavsøku segði løgmaður soleiðis:
– Allir flokkar halda, at Føroyar eiga at hava sjálvstøðugan limaskap í viðkomandi altjóða felagsskapum. Eitt nú heimshandilsstovninum WTO og í fiskivinnufelagsskapunum NEAFC og NAFO.
Og nú eru vit eisini farin at missa tolið við Norðurlandaráðnum. Í hálva øld hava vit roynt at fáa fullgildan limaskap – til fánýtis.
Eftir ólavsøku fari eg at kalla forfólkini í øllum flokkum inn, so breið semja kann fáast um, hvussu vit víðka rásarúmið á uttanríkispolitiska økinum.
Her krevst, at vit lata ósemjurnar um loysing/samband liggja og savna okkum um tað, vit eru samd um. Annars koma vit ikki úr stað.
Og í hesi løtu sita forfólkini í politisku flokkunum á tingi á hesum fundi saman við løgmanni í Tinganesi. Haru eru Aksel V. Johannesen, løgmaður og formaður Javnaðarfloksins, Beinir Johannesen, formaður Fólkafloksins, Bárður á Steig Nielsen, formaður Sambandsfloksins, Sirið Stenberg, forkvinna í Tjóðveldi, Ruth Vang, forkvinna í Framsókn, og Jenis av Rana, formaður í Miðflokkinum.
##med2##Okkurt bendir á, at tey fara at tosa í fullum trúnaði, tí áðrenn tey fóru inn á fundin, vórðu øll biðin um at leggja fartelefonirnar frá sær uttan fyri fundarhølið.
Í gjárkvøldið skipaði Sambandsflokkurin fyri fundi, at breið semja tyktist vera millum allar flokkar um at skipa ríkisfelagsskapin øðrvísi – nakað sum líkist tí, sum Mette Frederiksen, forsætisráðfrú, segði 3. oktober í 2023, sum ein ríkisfelagsskap millum trý lond, trý fólk, tríggjar tjóðir og trý mál.
Spennandi verður at frætta, hvørja niðurstøðu forfólkini koma á fundinum hjá løgmanni í dag.
##med3##
##med4##
##med5##
##med6##
