Ísraelski herurin heitir á øll í eystara parti av býnum Khan Younis í sunnara parti av Gazageiranum um at fara úr økinum.
Soleiðis ljóðar tað í morgun í fráboðan sambært Reuters.
Áheitanin kemur eftir "týðandi yvirgangsvirksemi og rakettálop" móti Ísrael, stendur í fráboðanini.
Sambært fráboðanini skal rýmingin fara fram undan tí, sum Ísrael lýsir sum eitt "máttmikið" átak.
Íbúgvarnir í økinum verða eggjaðir til fyribils at rýma til tjaldleguna í Al-Mawasi nærhendis Rafah, sum er eitt humanitert øki.
Ísrael hevur fleiri ferðir fyrr boðað frá líknandi fráboðanum. Bæði í pørtum av Khan Younis og Rafah.
Nógvir palestinar eru flýddir til Khan Younis og onnur øki í sunnara parti av Gazageiranum sum avleiðing av átøkum hjá Ísrael har norðuri.
Fyrr í juli doyðu í minsta lagi 90 fólk í einum álopi á eina tjaldlegu í Khan Younis, upplýsir heilsumálaráðið í Gaza, sum Hamas stýrir.
Tjaldlegan í Al-Mawasi hevur eisini fleiri ferðir verið rakt av álopum. Fyrr í hesum mánaðinum varð kunngjørt, at í minsta lagi 71 fólk høvdu latið lív í einum álopi.
Sambært Ísrael hendi álopið í eini roynd at sleppa av við ovasta leiðaran í hernaðardeildini hjá Hamas, al-Qassem-brigadunum, Mohammed Deif.
Hann hevur verið sagdur at vera ein av høvuðsmennunum aftan fyri óvæntaða álopið hjá palestinsku rørsluni á Ísrael 7. oktober í fjør.
Í álopunum doyðu umleið 1.200 fólk og tað birti aftur lív í drúgvu ósemjuna.
Hamas og sameindir bólkar tóku umleið 250 gíslar. 116 eru framvegis í Gaza, harav 42 sum sambært herinum eru deyð.
Síðani Ísrael fór undir álop á landi í Gaza 27. oktober, hava ísraelskar herdeildir flutt seg longur suðureftir við tí endamáli at vinna á eindum hjá Hamas. Bardagar hava tó eisini kyknað aftur norðuri.
Umleið 39.980 fólk - eisini mest sivilfólk - eru deyð undir álopinum hjá Ísrael í Gaza, upplýsir heilsumálaráðið, sum Hamas stýrir.
/ritzau/Reuters